Көк Төбө — Алматынын жүрөгү
Көк Төбө — Казакстандын мурдагы борбору Алматыдагы көрүнүктүү жайлардын бири. Көк Төбө телерадио мунарасы жана оюн-зоок борбору шаар тургундары жана туристтер көп каттаган жайлардын катарын толуктайт.
11 Şubat 2022 19:13
Көк Төбө телерадиоберүү мунарасы 1975-1983-жылдары курулган. Бийиктиги 371,5 метрге жеткен мунара Казакстандын эң бийик телемунарасы. Ошондой эле дүйнөдөгү эң бийик 14-мунаранын катарын толуктайт.
1984-жылдын октябрь айында мунарада өрт чыгып, анын кесепетинен көпкө чейин жабык турган.
2013-жылы Алматы муниципалитети Көк Төбөдө маданий-көңүл ачуу борборун куруу чечимин кабыл алган.
Бүгүнкү күндө Көк Төбө маданий оюн-зоок борбору меймандарга асма жол, зоопарк, сейил бактарды жана түрдүү ресторандарды сунуштайт.
Деңиз деңгээлинен 1130 метр бийиктикте жайгашкан борбор шаардагы көрүнүктүү жайлардын катарын толуктайт.
«Көк төбө» асма жолу
2017-жылы Казакстанда өткөн эл аралык ЭКСПО жарманкесинин ачылышына карата реставрацияланган асма жолдун узундугу 1620 метрди түзөт.
Асма жол меймандарды Көк-Төбө тоосуна алып барат. Аталган тоодон шаардын дээрлик бардык жерин алаканга салгандай көрүүгө болот.
«Нухтун кемеси» - экзотикалык жаныбарларды реабилитациялоо борбору
Оюн-зоок борборунда чакан зоопарк жана экзотикалык жаныбарлар үчүн реабилитациялык борбор жайгашкан.
Оюн-зоок борбору
Оюн-зоок борбору ар кыл көңүл ачуучу кызматтарды сунуштайт. Борбордо оюн-зоок парктары, казак даамдарын жана дүйнөлүк ашкананын эң даамдуу үлгүлөрүн тартуулаган ресторан жана кафелер орун алган. Ошондой эле концерттер жана театралдык көрсөтүүлөр үзгүлтүксүз уюштурулуп, Көк-Төбөгө көрк кошот.