Казакстан кыргыз-казак чек арасындагы бекеттерди чет өлкөлүк жарандар үчүн жапты

Казакстан Кыргызстандын жана үчүнчү өлкөлөрдүн жарандары Казакстан аймагы аркылуу башка мамлекеттерге транзиттик каттоосуна убактылуу тыюу салды.

07 Ocak 2022 14:14

Кыргызстандын Улуттук коопсуздук боюнча мамлекеттик комитетинин Чек ара кызматы казак тараптын демилгеси менен айрым чек ара бекеттери жабылганын билдирди.

Маалыматка ылайык, КР УКМКнын Чек ара кызматынын маалымат жана коммуникациялар башкармалыгы 2022-жылдын 7-январынан тартып казак тараптын демилгеси менен бир тараптуу Казакстандын Бирдиктүү маалымат тутуму иштебей жаткандыгына байланыштуу Чүй облусундагы кыргыз-казак мамлекеттик чек ара аймагындагы "Кордай-авто жол" - "Ак-Жол-авто жол", "Карасу-авто жол" - "Ак-Тилек-авто жол" жана Ысык-Көл облусундагы "Кеген-авто жол" - "Каркыра-авто жол" өткөрүү жайларынан жарандарды жана транспорт каражаттарын өткөрүүнү убактылуу токтоткондугун маалымдайт.

2022-жылдын 7-январы саат 14:00 карата COVID-19га байланыштуу болгон чектөөлөрдү эске алуу менен кыргыз-казак мамлекеттик чек ара аймагында Чүй облусунда "Чалдыбар-авто жол" жана Талас облусунда "Чоң-Капка-авто жол" өткөрүү жайлары штаттык режимде иштеп жатышат.

Ошону менен бирге Кыргызстанда жүргөн Казакстандын жарандары "Ак-Жол-авто жол" (КР) - "Кордай-авто жол" (РК), "Ак-Тилек-авто жол" (КР) - "Карасу-авто жол" (РК) жана "Каркыра-авто жол" (КР) - "Кеген-авто жол" (РК) өткөрүү жайлары аркылуу чыкса болот.

Ал эми Казакстандын аймагында жүргөн Кыргызстандын жарандары Чүй облусундагы "Чалдыбар-авто жол" жана Талас облусунда "Чоң-Капка-авто жол" өткөрүү жайлары аркылуу гана кире алышат.

Кыргызстандын жана үчүнчү өлкөлөрдүн жарандары Казакстандын аймагы аркылуу башка өлкөлөргө транзиттик каттоосуна убактылуу тыюу салынды.

Anahtar Kelimeler: казак-кыргыз чек арасы,