Кыргызстанда Евразиялык экономикалык форумдун пленардык жыйыны болуп өттү
ЕАЭБ өлкөлөрүнүн лидерлери видеоконференция аркылуу Евразиялык экономикалык форумга катышты.
26 Mayıs 2022 20:50
Бишкек шаарында бүгүн, 26-майда, ЕАЭБ жана алыскы өлкөлөрдөн 2000ден ашык адамды чогулткан Биринчи Евразиялык экономикалык форум башталды.
Евразия экономикалык форумунун пленардык жыйындарынын бирине ЕАЭБ өлкөлөрүнүн лидерлери видеоконференция аркылуу катышты. Бул: Кыргызстандын президенти Садыр Жапаров, Казакстандын президенти Касым-Жомарт Токаев, Россиянын президенти Владимир Путин, Армениянын премьер-министри Никол Пашинян, ошондой эле Беларустун премьер-министри Роман Головченко.
Суроо-жооп форматында мамлекет башчылары ЕАЭБ алкагындагы көп тараптуу мамилелер, Биримдик өлкөлөрүнүн экономикаларынын байланышын жогорулатуу, адамдык капиталды өнүктүрүү жана башка көптөгөн маселелер боюнча өз көз караштарын жана ой-пикирлерин билдиришти.
Кыргызстандын Президенти Садыр Жапаров «ЕАЭБди өнүктүрүү — бул Биримдикке кирген ар бир мамлекеттин өзүнчө обочолонгон процесси эмес, ал ага мүчө-мамлекеттердин баарынан көз каранды болгон бири-бирин толуктоочу процесс», — деп билдирди.
Мамлекет башчысы экономикалык интеграцияга баа берүү боюнча үчүнчү суроого жооп берип жатып, статистикага токтолду. Мисалы, 2021-жылы Биримдиктин ИДПсынын өсүшү 4,6% түздү деди ал.
Ал эми Казакстандын президенти Касым Жомарт Токаев Евразия экономикалык биримдиги азыркы эң оор геосаясий шарттарда да өзүнүн эффективдүүлүгүн көрсөткөнүн белгилеп, "Ар бир мамлекет өзүнүн улуттук кызыкчылыгын биринчи орунга коёт. Бул соода маселелери менен алектенген бардык эл аралык институттар үчүн кадыресе көрүнүш",- деди.
Никита Михалков ЕАЭБ мейкиндигинде евразиялык кино академиясын негиздөөнү сунуштады
Россиянын Кинематографисттер союзунун төрагасы Никита Михалков Евразия экономикалык форумунун алкагында ЕАЭБде евразиялык “Оскар” сыйлыгын жана киноакадемиясын түзүүнү сунуштады.
Анын айтымында, сыйлыкка катышуу биздин идеологияга туура келген тасмаларды тартып, адамдык маңызын бузбайт.
“Сыйлык кымбат болушу керек, ал үчүн күрөшүү керек. Жыл сайын ага Евразия мейкиндигинде чыгарылбаган, бирок биздин принциптерге туура келген бир тасма кирет. Бул Евразия мейкиндигинин саясий өнүгүүсү үчүн абдан зарыл экенине ишенем. Муну эң жогорку деңгээлде чечиш керек”, - деди ал.
Белгилей кетсек, экономикалык форум Кыргызстандын Евразиялык экономикалык биримдиктин органдарында быйыл төрагалыгынын алкагында Жогорку Евразиялык экономикалык кеңештин жыйынынын алдында өттү.
Форум өтүүчү бардык жайларда жалпыга маалымдоо каражаттарынын өкүлдөрү үчүн пресс-залдар түзүлгөн, ошондой эле иш-чаранын спикерлери үчүн пресс-конференциялар уюштурулган.